人有書展, 薯女又書展

忙左一個禮拜, 薯女去到今日個productivity已經去到30%, 用左3個鐘去做原本只應該用1.5鐘去做既report. 難得聽日朝早冇乜特別事, 想總結下上個禮拜既一個event.

呢個禮拜全城最熱門既話題, 除左會展個book fair之外, 就係harry potter出大結局. 對於薯女黎講, 呢個禮拜, "書"都係一個hot topic. 上回講到個regional既project, 就係請d clients黎聽大老細個friend出新書既介紹, 薯女無端端變左唯一單挑大樑既卒仔(E仔= execution), workload重左好多, 不過亦學到更加多.

之前果幾日d bind書, logistics support, 同各vendors liaise, RSVP等都係考細心同埋耐性. 薯女好好彩, 各方面都非常合作, 而admin dept既同事亦非常識做, 幫左薯女好多. 其實薯女最擔心都係當日d人既反應, 同埋大老細會唔會鍾意.

薯女當日就係個event開始之前1個鐘跟隨個SAM去到, 薯女不停走上走落, set場地, 同場地d人做last minute野, 心裡面不停諗有咩事情有可能會發生, 再諗有咩方法可以避免發生, 薯女再check多次一切安排妥當之後, d guests開始到左, SAM當然要開始湊住個author / speaker同d guests social, 而其他高層亦相繼到達. 因為個event請左好多鬼既關係, 而以上提及過既人物全部都係鬼, 又或者講鬼話既人, 薯女知道有職責撈住d人, 好好彩又俾薯女撈住個自己team既大client既特派專員, 再將佢同另一個薯女條team既potential client既人engage一齊, 令到薯女d高層非常滿意.

之後個event好順利咁完成左, 個speaker仲留低同SAM同埋薯女食lunch, 似乎佢都好滿意.

完左event, 返到公司, 雖然d野已經林到天花板咁高, 不過薯女得到高層認同, 已經好開心. 黎緊仲有幾個event, 相信薯女一定要做到更加好, 更加細心, 一定要達到零mistake!

啞忍???

薯女近期又忙住搞event喇. 忙, 並唔係問題, 但係, 忙得黎, 又激氣就係問題.

薯女身體狀況日差, 好想賴落個另一個E仔度, 話係佢令到薯女日日胃痛頭痛失眠心悸. 其實大家聽落可能真係覺得冇乜野, 不過... 講出黎, 等大家笑下又好, 俾薯女釋放下d怨氣都好.

事緣其實上回講過, 十一月個event"辣"著學長同E仔既深仇大恨. E仔發脾氣, 表明自己有其他accounts要跟, 唔會有時間做呢壇野. 學長因此怕左E仔, 相信係呢個原因, 令到好多工作突然shift晒落薯女度.

正當上個禮拜果壇野靜左之後, regional又突然俾左個event薯女條team跟. 上頭搵3個E仔是但一個認頭, 薯女覺得自己hour rate最低, 所以知道別無選擇, 好"義不容辭"咁接左黎做. 誰不知果位最討厭做event management既E仔又突然搶住say yes. 果日個email不停見到back and forth佢同上頭傾, 不過之後好快就見到上頭屬意叫薯女做. (應該係因為個hourly rate真係平d) 之後就不停出現一有email彈出黎, 佢就搶住say yes既情況. 薯女心諗, 都冇所謂喇, 薯女又唔係要爭, 最緊要做好件事. 點知到第二日, 佢就開始冇再覆email, 到今日, 薯女忙到就死之際, 佢已經離開internal email既CC行列. 老細出email鼓勵條team都已經得返薯女同另一個SAM.

正當戰鬥進行得如火如荼, 天昏地暗之際, 琴日學長又突然殺出黎, 追殺薯女同E仔, 按照先前分工, 叫E仔星期3前交個media list出黎, 點知E仔推說話星期4有press conference, 要果日放工前先俾到學長, 唉... 佢咁講, 即係難為薯女jeh... 學長果然衝左埋黎薯女個位, 逼薯女啃埋佢... 薯女不甘示弱, 打聽到E仔講既press conference其實應該係星期3搞, 就出email反問E仔個press conference唔係應該星期3搞咩, 因此... E仔又一股怨氣湧埋黎, 叫薯女俾番個media list佢跟. 仲要整句: "我諗我跟會好d囉!" 好好好, 當然冇問題, 薯女依然相信果句: get the job done!

唉... 原本好地地... 點解要咁? 不過薯女唔理喇, 發完嘮叨之後, 選擇... 訓覺!

未定性

始終覺得自己未定性... 冇得坐定定等升職加人工.

琴日食食下lunch收到個舊朋友既電話, 第一句就問薯女做呢份工做得開唔開心. 薯女呆左一下, 佢就話有份project想介紹俾薯女, 係一個movie production既project. 聽落真係好有趣, 薯女自己明明好滿意依家份工, 但都係心癢癢, 忍唔住想知多d究竟係咩既一回事, 有一刻真係心諗quit左份工, 去玩下.

好明顯, 薯女真係未定性.

同d朋友傾計講開, 有人劈頭一句: 你會唔會想係電影行業發展? 薯女先有少少恍然大悟. 雖然PR行內好興做做下agency A去agency B, agency B轉去agency C, 之後又返去agency A. 有為升職, 為加人工, 亦有為累績agency經驗. 但講緊都係同行, 同一個practice, 只係轉換環境, 同卡片上個title. 薯女諗都冇諗過要轉practice...

薯女有時候會幻想做夠一年會順理成章升職, 更加會誇口會係30歲前升到上senior account manager, 亦預期自己未來2年都會留係呢間公司. 點知一個完全irrelevant既referral就令到薯女心猿意馬, 可想而知, 假設無端端有個referral, 同一practice, 職位高半個level, 叫薯女去試, 薯女應該諗都唔諗, 抱住試得唔好"晒"既心態, 走左去interview.

唔係不滿現狀, 但係見到有新既機會就想去爭取, 但係完全冇諗過將來, 只係怕錯失會後悔. 係未定性既表現? 定係唔成熟?

不想北上...

第一次要跟咁大型既conference, 竟然會需要上內地搞... 薯女要到11月先會重生.

上個星期薯女抱住返工等放假既心情迎接星期一, 點知黑暗時代就係當日朝早開始左! 薯女一向跟開一條唔賺大錢都唔做既team, event management從來都唔係我地果杯茶, 不過自從新fiscal year開始左, 條team個budget高左好多之後, 我地就開始"飢不擇食", 薯女亦收到一個好特別既任務, 同一個E仔一齊直接跟個account manager搞大壇野.

由最基本既research, quotations, logistics arrangemen, site visits, 到同其他office liaise, 同客deal, 幫手諗angle, 薯女第一次全程跟足, 感覺好興奮, 但又好怯. 個conference雖然仲有排先搞, 但籌備工作正式展開. 上個星期薯女就係朝8晚8既情況下度過. 今次再加上個E仔同個AM合作上有d磨合唔到, AM開始越來越下放E仔職責落薯女. 望住自己個timesheet未填admin duties已經衝到上9個鐘, 薯女啞口無言.

今日多得有個E提醒, 原來薯女除左平日都要做既clipping reports, admin工作, 幾個retainer既工作之外, 好多new business都同薯女有關... 而假期過後, 會有一大堆原本pend住左full speed進行, 薯女開始意識到, 早午各一杯black coffee, 夜晚因為太熱氣而要狂灌涼茶既日子將會來臨.

除左感謝各位大人咁睇得起薯女外, 薯女都唔知講咩好... 祝薯女好運啦@@

"Good initiative!"

多得學長, 薯女上兩個星期過得十分充實, 前兩日填timesheet先知, 原來每日平均超過10個鐘, 其中一日係12個鐘. 雖然對於一般PR agency黎講唔算咩一回事, 但對薯女黎講, 已經達到爆廠程度.

其實學長個人冇乜野, 不過人鬼殊途, 薯女同學長始終有d隔膜. 加上學長主理既係new business, 而薯女就個個accounts都要跟, 所以薯女通常每日都會俾一大堆routine admin, ad-hoc tasks淹沒. 另一位E仔就似乎比較專注new business, 按道理, 學長應該比較用到佢既機會會大d, 不過學長似乎有意發掘薯女潛能, tight deadline + impossible missions, 成為薯女上兩個禮拜既生活.

有一次, 薯女被上頭motivate到昏頭轉向, 好proactive咁做左一件事, 得到唔少額外收穫, 原來仲附送一項任務. 明明個account唔到薯女跟, 點知, 學長以為薯女好得閒 (當日學長已經委派左幾件大野俾薯女跟), 又叫薯女做. 薯女一頭霧水, 趕頭趕命趕完d野之後, 交返俾佢, 佢就無端端話: "good initiative!" 薯女心諗, 真係愧不敢當! 真係唔係薯女initiate!

相信未來將會繼續有機會合作... 薯女自認辛苦命, 唯有講... thanks for the new business!

懶

好幾日冇寫blog, 唔知仲有冇人睇呢?

向client出發

薯女其實真係唔太知道一張client list能唔能夠反映你得唔得到公司重用, 不過就因為一張咁既list開心左成日.

事緣5月尾就係我地financial year end, 埋單袋多左錢落袋, 就要plan定來年要”食”幾多喇, 所以今日director就同大家睇下個”menu”喇.

當薯女收到director email既”餐單”之後, 真係忍唔住喜上眉梢, 因為第一樣見到既係一個一直未公開會由邊個接班既大account已經塵埃落定, 由E仔2號同薯女頂上, 除左要deal with一個幾麻煩下既客, 仲要直接同香港區chairman liaise, 諗起都興奮! 因為始終薯女覺得自己仲好新, 上頭已經咁相信薯女能夠勝任, 直接俾一個retainer薯女同另一個E仔去跟; 另一方面, 薯女有d怯, 怕自己handle唔黎, 不過薯女知道, 無論如何, 都要做好佢.

個list另一特點, AD, 紅人, E仔2號同薯女都係比較常出現既名字, 反而空降部隊同E仔1號個名就主要出現係new business, E仔1號仲要冇係幾大accounts入面出現, 似乎情況麻麻.

另外, director亦都叫左我地幾個E仔各自入房傾下個list. 薯女第一時間衝左入去, 一坐低, director就講左幾句, 主要係欣賞薯女既contribution, 又話薯女一直都好proactive咁幫條team做野, 又話只要keep it up, 會對薯女既career development有好正面既影響等等. 薯女聽完心都甜晒. 接著落黎, director就開始同薯女go through個client list喇, 薯女其實好滿意個分工, 講真, 薯女呢舊薯仲係種植期, 有排先到收成期, 薯女能夠個個clients都掂下, 薯女相信會grow得更快. director話咁既安排想同時間睇下薯女有咩長處, 短處咁, 同埋認為薯女可以從E仔2號身上學到好多野 (薯女有幾個account都同佢一齊跟).

從director間房行出黎之後, 薯女有一種莫名既興奮同感動, 其實薯女真係唔太清楚自己係咪deserve director咁多compliments, 不過薯女仲有一條好長既路要行, 一定要加油!

又再次俾director既一番話motivate到. 相信薯女呢種員工一定為HR省卻唔少煩惱同麻煩.

PR = Public Relations + Personal Relations

其實自己兩日前已經update左, 點知臨"publish"之前, 唔小心禁錯制, delete晒d野. 唉, 公司offsite training左兩日, 今日終於可以坐定定, update個blog喇:

隨著"人口"急速增長, 人事關係亦都變得越黎越複雜. 以前只有4個點組成既蜘蛛網依家變成8個點, 自然變得千絲萬螻.

早前提到薯女同AD講過既一番話, 風平浪靜左一排, 但其實有個暗湧湧左落事件中既另一個E仔 (件事應該係成為AD召見個E仔既近因, 遠因詳見下文) AD對佢既一番話, 可謂苦口婆心, 畢竟一個出身local agency既local要manage一條predominantly都係鬼既team真係唔易; 不過可惜E仔似乎唔太受落, 要同薯女食下煙吐下苦水咁. 講真, 薯女當然明白佢既不滿, 明明覺得自己deserve果個位, 入到黎先知已經俾人攞左; 加上上頭明言"小朋友"要聽"大人"話, 佢覺得唔服氣係絕對正常. 再者, 事件中另一位E仔其實都唔易相處, 自然造成些小誤會, 講真, 薯女都花左好一段時間先同佢磨合到.

只不過, 大家都係同一個rank, 只係前面差一, 兩個字, 又何必咁介懷? 其實最緊要都係大家為條team做野, 你只要肯付出, 條team都會好公平咁reward番你.

其實薯女都算幾好彩, 大家都好俾面薯女, 唔介意同薯女建立關係. 可能薯女真係比較"青", 大家都對薯女冇乜戒心. 不過就要小心d囉, 要避免俾人感覺我take左side咁. 試睇睇, 紅人個徒弟E仔1號, 就同E仔2號唔係太夾, 但係E仔2號又係一個表現唔錯既新秀, E仔1號曾經同薯女講, 唔太鍾意薯女同2號熟. 不過AD又似乎唔太鍾意1號... 咁既情況, 薯女真係要小心d.

本來係中高層既戰線蔓延到中下層, 究竟薯女會變成漁人, 定係羔羊?

PS. 一向直腸直肚既紅人今日(<-15/5)加左一句"well done"係個report度, 令薯女開心足成日, 薯女要繼續努力!!!

與associate director對話

自問唔係一個好守得秘密既人, 不過奇怪地, 好多同事/朋友都以為我係一個secret-keeper, 所以其實我聽聽埋埋真係唔少野, 變左個是非收集箱.

今日本來同個AD食飯, 連台詞都諗好, 諗住正正經經咁做下pre-appraisal. 點知, 可能大家背景有d相似 (大家都係同一間agency做過野), 越傾越多野傾 (其實係我越多野問), 最後係食左成兩個鐘! 仲有d感動位... 原來, 我真係一個好薯既薯女.

其實有好多野, 我真係知道架, 例如做野要平常心, 要客觀睇野, 工作中識到朋友係bonus, 等等等等, 都係老生常談, 不過出自AD個口就一定convincing d. 佢講左好多之前既經歷俾我聽, 亦都有比較番之前同呢度既分別. 我亦都見到平時作為薯女見唔到既野. 高層之間關係越好, 下面就越容易辦事. 所以其實係我條team做野真係好幸福.

本來都冇諗住講得太多, 點知講講下, 越講越覺唔對路, 越講越多, d故事人物開始呼之欲出... AD覺得事態嚴重, 因為我地team係絕對唔容許d搞搞震既情況發生, 人事糾紛係禁忌, 所以佢"鼓勵"我開名討論. 似乎知得太多是非, 真係唔多好...

值得開心既係, 佢都覺得我地team既pace係可以再加快d, d人個mentality可以再改善d.

食完餐飯後, 薯女一陣孤獨感湧上心頭... 望住一盤寫住"fin com team"既棋盤, 一隻隻棋擺晒係度, 望落係好團結, 其實...

大家都只係一隻棋.

當空降部隊成為學長的學長計劃

自從知道邊個係自己學長之後, 就真係唔係太想食個mentorship lunch.

首先人地貴為空降部隊, 駐紮冇耐, 佢對本地個pr industry唔熟悉; 再者, 人鬼殊途, 本地media聽到d PR凸一個英文字咁大把已經覺得你懶巴閉咁喇, 英文人係生存唔到, 我最concern既media relations, 相信佢答到我既有限. (今日我仲證實埋, 原來佢係之前個駐紮營地, 係負責湊clients, 佢係唔會pitch local media...) 最後, 佢除左後台勁之外, 我係佢身上只係見到紅人既奚落 (冇計, 任何野聽夠100次都會變真) 而好多時我都係睇紅人個頭行動, 紅人又擺明唔妥空降部隊, 我尷尷尬尬咁夾住係中間, 睇黎真係要好似瑞士咁, 唔take sides, 先可以生存到? 但係, 對於入世未深既我, 究竟可以點樣做到?

餐飯係大家"你不情, 我不願"既情況下開始喇. 首先大家講下食野, 講下佢之前個營地既情況 (因為我知佢好懷念舊地) 坐低, 見到佢攞住撘printout, 原來係我地之前傾過有關mentorship既email, 佢問左我一大堆問題, 我覺得自己似個病人, 個醫生係咁問一d我自己都解析唔到既病症. 又問下我對自己career development有咩睇法, 好明顯, "醫生"係跟足個checklist幫我剔格仔.

講講下, 我問佢如果我想搞好d media relations, 我可以點做. 佢話, nice d喇, helpful d喇, 見到d野佢會有興趣既, 就算唔關client事, 都forward俾佢. 我心諗, 平時send send埋埋咁多新聞稿, 傳媒邀請, 再加埋呢d forward email, 人地唔當你係spam先奇. 再者, 我問緊既係, 點樣可以approach media, 佢就skip晒頭幾個steps, 假設你同人熟到知道人地有咩興趣...

我唯有問另一個問題, 假設你根本唔熟悉個industry, media又同你講起, 點同d media吹水? 我心目中預期個答案會係: 你先做好product knowledge先; 或者: 索性講明自己唔識, 不過好樂意向各media朋友請教, 本人覺得, 虛心學習永遠都唔會得罪人. 點知, 學長就話: 如果唔關我地clients事, 就直接話唔識; 不過當然, 你可以同個journalist講d唔關個industry既野. 我真係俾佢搞到一頭霧水... 唉...

再加埋佢既一個問題... "乜你唔係同d media pitch緊某個客既analysts' briefing咩?" 天呀... analysts' briefing係我地幫個客揾d analysts返黎, 個客同d analysts開briefing呀, 點解會變左做我pitch d media??? 關d media咩事? 再者, 就算你誤會press conference同analysts' briefing, 最多都係RSVP, pitch media呢d高層次少少既事情, 當然我未擔得起大旗!

最後, 佢係選擇講大家既拍拖生活去堆塞dead air. 臨走前, 佢講左句, "咁我地3個月後再食個lunch傾傾喇..." 我突然先發覺, 原來我公司係大到... 我地要3個月前約好左, 先會撞到架!

五一*勞動*節

近期小妹個blog靜左咁多. 無他, 勞動是也!

本來weekend加個勞動節假期真係好爽, 點知星期六晚一個電話就將小妹既心情徹底摧毀. 話說我地隔離team原本有個客臨時開press conference, 宣布某某名人將會出任佢地個CEO. 本來就冇乜野, 但揀紅日去開press con, 再要求我地幫佢揾6,70個media出席, 而佢地只肯俾我地計到個budget既一半, 隔離team就梗係耍手寧頭. 點知個客唔肯罷休, 點名要求我地team個第二把交椅去做, 而基於原因一, 二, 三, 四同五, 我地係接左黎做. 件事急成咁, 小妹收到電話既時候, 真係以為係crisis management!

可能我真係見識少, 未見過d客衰到好似佢咁! 個客預先講明, 我地唔可以開個名人既名. 唉, 明知道一開個名, 個draw會好大, 要d media黎絕對冇難度, 但就係因為某d原因, 我地被逼封口, 心諗, 唔好話30個ㄚ, 10個都唔知有冇...

我地星期一大清早就飛左個target media list俾佢, 個media invitation我地改都懶得改, 諗住儘快飛左出去就算, 以為可以go ahead, 一切進展得如火如荼之際, 我地收到消息, 個名人既秘書自己打電話俾d相熟記者朋友, 話佢地都會開press conference宣布個名人既去向. 雖然佢地唔講個venue, 但係日期, 時間, 性質一模一樣, 明眼人一睇就知喇! 感覺被玩... 仲要聽到上頭同個client deal完, 佢地唔接受我地既30個media既target, 堅信香港既media同大陸果d一樣, 俾錢就得喇. 真係人都灰晒...

基於事態嚴重, 我地惟有大少通殺, 除左平時既金融版, 財經版, 我地連咩週末睇樓王, 股票行情都照殺, 仲開始連政情版都唔放過. client果邊又突然整過個target media list俾我地, 話要加多幾件, 呢個時候唔止大既頭痕, 細既都俾人點到頭暈暈. 之後又突然要求我地請埋港聞版... (我join左financial communication team第一次見d client咁想上港聞) 我地幾個E仔著住high heels office周圍跑, 個情景就好似片場拍7日仙咁, cue紙對白周圍飛.

晚上7點半, 已經係戰鬥展開11個鐘頭後, attendance仲係冇起色. 但上頭似乎仲想作戰到底, 冇辦法喇, 佢俾個client同media夾住, 又唔可以發洩落我地度, 只見佢面色灰晒, 不停追問我地究竟邊個media會到, 大佬, 11點先出assignment, 個client死都話已經有N咁多個media會到, 我點俾到個attendee name list你呀??? 難為我另一位同事, 俾client突然彈過黎既一分新聞稿要中譯英吹到啤啤聲.

當日去到會場, 好好彩一切都好順利, d media見到個名人都唔知幾踴躍發問, 算係咁喇. 不過可能係我有偏見, 我真係對個client冇乜好感. 佢地全體30幾人號召返工, 就係為左坐滿個場, 見到咁既情況, 我地只可以一笑置之. 最好笑, 都係佢地攞左本貴賓名冊出黎, 想叫d media簽...

唉, 咁就去左一日喇. 不過絕對大開眼界.

假期前的風起雲湧

先前提及的空降部隊與紅人之爭, 今日再有新進展!

話說空降部隊務求新官上任, 即有建樹, 不停有新initiatives. 小妹妹眼中, 都覺得其實係為公司好, 始終, 做好晒media profile的確對發展係有幫助! 不過, 紅人就覺得, industry practice係media成日洗牌, 你整完個profile, 分分鐘下次要用既時候又要再update過. 不過空降部隊係神不知鬼不覺既情況下, 叫左我同另一位同事做, 當我同事send左個general email俾全世界, 會報進展既時候, 我耳邊就響起一聲尖叫, 接著既係一輪連珠砲轟. 起初我以為紅人係鬧緊個客, 所以不以為意, 聽聽下, 開始越聽越精采... "真係廢人做廢野... 頭先開完會, 仲ong居居坐係度..." 我終於意識到係星球大戰前奏.

接住落黎, send email既果位同事就出現喇, 俾紅人教路一番之後, 空降部隊又出現, 紅人示意個同事返埋位, 之後係令人不安既寧靜, 再之後, 紅人開口好"婉轉"咁奉勸空降部隊棄城投降, 唔好再繼續個initiative, 空降部隊作戰到底, 最後, 戰事就係一片沙塵滾滾中, 消失得無影無蹤喇.

談management style

再一個問號.

公司近來連連招兵買馬, 急速得近乎畸形咁增長, 生意應該唔錯.

不過似乎係... 新人增長率 > 新客增長率. 危險危險.

想像下3月初, 我條team得4個人, 到今時今日, 已經去到8個人. 雖然未至於出現僧多粥小既情況, 但已經令我擔心左一排: "死喇, 佢地會唔會請晒d人返黎, 跟住再炒d唔掂架?" 公司既架構其實都幾rigid, 甚至乎有d hierarchical. 中間係一大班SAM, 上面就係一堆鬼/半鬼人既D同AD, 而我身處既草根階層, 只佔全公司總人口10%. 初初入到黎, 梗係會憧憬下有日會升上SAM啦, 不過, 時至今日, 我已經回歸現實喇. 疊埋心水做個AAE, 其實, 反而可以睇到更多:

我條team個director其實係一個唔錯既director. 記得我初來報到, 佢都有照顧我一排, 定時定候一個電話, 問下我有冇問題, 又問下我做得慣唔慣, 維持左應該有幾個禮拜. (定係, 其實各SAM都覺得我做得麻麻, 睇下director可唔可以調整我呢?) 點都好, 我都好感激director咁樣做.

試過有一次, 有個大event, logistical support同human resources都好充分同完善既情況下, media attendance就麻麻, coverage... 更加係慘不忍睹. 個SAM梗係唔開心喇, 作為隨從既我, 梗係心情都有所影響喇. 小妹妹的確係小妹妹, 自己其實都知道, 真係唔關我事, d media唔到, 唔通我攞住支槍指住個記者個頭逼佢黎咩? it is not gonna work! 呢個時候我就同director講喇, 我覺得自己做得唔夠好, blah blah blah, 佢就的左我入房安撫我, 再加少少motivation boost, 我即刻容光煥發既行返出黎, 心中果團火真係燒到hum hum聲架!

呢d咪叫功力好囉!

相比之下, 有位空降部隊就要學習下喇. 原來我地team個當紅炸子雞曾經同佢合作過, 人未黎到, 個名都已經臭左. 咁我承認我係有d biased既, 因為我已經視我地team既紅人為偶像, 立志要成為佢旗下既馬仔學野. 咁既情況下, 我唯有立即出招"抽身離魂", 上太空望返落個地球. 起初都覺得冇乜野, 但佢lead既project一in action, 問題就黎喇, 事關我地有個做過media既人係度, 某人就順水推舟, 將所有media pitching工作都推落個同事度, 自己就日日6點走人. 我偶像梗係立即出聲喇, 由於個空降部隊原來係隻鬼既關係, 我偶像講人話就梗係講得仲大聲d喇! 大家咩都聽到晒lu....

至於講到正面交鋒, 發生左兩件事, 我都首當其衝, 成為受害者.

話說我地自己有個initiative, 想做個research咁, 我地team(to be specific, 應該係個director)習慣所有email都會有個回覆, 不外乎"XXX - Great! thanks!" 但呢位空降成員似乎唔太習慣wor. 我send左個excel spreadsheet俾佢, CC左director同另一位同事, director已經俾左green light, 點知原來同事已經同空降部隊com好左, 指定要用word document. 我係不知情情況底下, 面濛濛問空降部隊點解要用word doc, 得到既回覆係: XXX已經花左好多時間去做個word doc, 我地都係stick to it喇. (注: 個doc只係幾個bullet point...) 真係俾佢吹到啤啤聲. 之後我send多個email問個究竟, 個同事先同我講, 佢同空降部隊之前個星期五已經com好晒...

之後, 我唯有跟大隊用word doc喇, 諗住send左俾佢睇, 10am sent, 冇人覆. 去到下晝, 我位同事就突然整左個version B, 佢就覆喇, "Thanks, XXX!" 我見到當然有d心裡不是味兒喇... 同時間, 我更加擔心... 係咪佢收唔到我個file呢?不過都算喇, server上面果個係最update就算喇.

有時候做最細果個, 好容易會心態唔平衡. 明明覺得自己有料, 只係冇經驗, 但點解就係冇機會呢? 同時間, 只要有人對自己差少少, 就會不由自主亂諗野. 之後又會同自己講, 肯定係我做得唔好... 我係最細... 我點點點... 明明有不滿, 都要運用"抽身離魂", 上太空望返落地球, 好事係, 我學識任何事都要兩個角度睇. 每一個經歷, 都一定有所得著既, 我相信人行每一步, 都唔會白費.

another lesson of the day: 要manage人, 先要manage自己

舊post重溫

總是在某些時候，站在人生的交叉點上，躊躇滿志．

昨天以為走對了，以為自己不會後悔，
今天竟覺碟上放著一塊雞肋．
自覺一輩子總是給面子牽著走．

穿得一身名貴套裝，挽著名牌手袋，濃妝豔末，花姿招展，好不風光．
出入甲級商廈，的士代步，穿梭文華、grand hyatt，
Pret A、Pacific Coffee天天光顧.
team director致電問好，同事相敬如賓，
probation過後醫療費用全包，茶水間供應充足，聯誼活動費用全免；
準時放工，福利完善，
撫心自問：what else do i want?

全team開會，樂得消遙，靜坐一旁，聽到自己的名字，點一點頭．
出外見客，緊緊跟在後頭，袋穩卡片，保持微笑，聽他們談論hours, hours及hours，及we sell hours．
早上清閒沖綠茶，下午有空沖咖啡，六點以後別找我．
but are these what i want?

天天research，clipping，media monitoring，RSVP，
strategic planning留給SAM，media relations有賴SAE，
其他？ "Oh, sorry, you are running out of hours." 得靠client自己執生，
media pitching不能"低聲下氣"，否則有失身分．
translation過於technical，煩請outsource．
公司賺錢靠hours，每天接受timesheet無情折磨．
clients如敵人，"吃不消了"掉頭跑．
大型外資公司文化，果然令我大開眼界．
成長本地平民agency的我，
頓變一頭刻苦耐勞蠻牛流落神戶街頭，六神無主．

回望不遠處西家的招手，
工時超長，24x7等閒事，
全黑打扮，穿插人群，
商場、戶外，疲於奔命，
strategic至開會brainstorm，
基層至clipping、穿膠花、勞作，
一人身兼數十職，全程一腳踢，人工fringe benefit彈性高，
哈，
懊惱、後悔、慨歎、愁眉難展．．．
蠻牛始終是蠻牛，
養尊處優等上碟恕難從明，
勤力耕作，日出而作，日入而sick，方合蠻牛養生之道．
唉．．．

fresh, so fresh!

其實從來冇諗過開blog講工作, 不過近來太多所見所聞, 令我呢個PR新鮮人蠢蠢欲動, 立志做個PR blogger.

小朋友曾經有幸在本地規模較大既PR agency做暑假薯薯, 雖然都係玩樂性質, 不過都算浸過夜粥. 畢業後, 本來都冇諗過要翻煲碗粥, 唔想晚晚做到11, 12點, 人工又唔過萬. 不過出到去浮浮沉沉, 都係覺得自己一條辛苦命, 注定要做PR呢行.

第一個entry, 都係keep it short, 講住咁多先.